اللهجه القاهريه
ودى اللهجه اللى بتستعمل فى القاهرة و الجيزه و القليوبيه و ليها قبول واسع من كل المصريين و بتتفهم في كل حتة عشان التليفزون و الافلام و المراكز الثقافية اللي في العاصمة المصرية.
المورفولوجيا/الصرفيات
1.صيغة المضاف اليه بتميل لاستعمال بتاع/بتاعة/بتوع للمزكر/المؤنث/الجمع على الترتيب.
2.صيغة المبنى للمجهول بتتعمل باستعمال البريفيكس إت- او إن- زي غُسِلَ (العربي) ← إتغسل او إنغسل (المصرى).
الكلمات/المفردات
اغلب الكلمات المصرية ليها جدور عربية بس دخلت عليها تغييرات في النطق و الجنس و فى كمان عدد كبير من الكلمات المصرية اللى من اصل قبطى زي (تاتا و امبو و إدّا و عنتيل و بعبع و بَحّ و يللا و بره و بـِخّْ و كلكع و كمان و كُحة و لقمه و قله و زير و تـَفّه و شأشأ و شبوره و جلابيه و ....). لهجة القاهرة استعارت بردو كلمات كتيرة من الانجليزى و الفرنساوى و الطاليانى و اليونانى و التوركى.
السينتاكس/النحو
•ضمير الاشارة (دا, دي, دول) و ضماير الاستفهام (إيه, فين, إمتا...) بتيجي بعد المتشاور عليه و بعد المسئول عنه بالترتيب و دي خاصية بتشمل كل لهجات مصر و ممكن يتفسر وجودها بالتأثر بالطبقة التحتية القبطي اللي كانت سايدة في مصر، مثال:
•الراجل دا (مصري) → هذا الرجل (عربي)
•إسمك إيه؟ (مصري) → ما إسمك (عربي)
•النفي بيحصل بـ حَط الفعل (و الاسم في اللهجات الصعيدي) بين أداتين نفي ما و ش ودي كمان نفس طريقة النفي في القبطي
•ماشربتش (مصري) → لم أشرب(عربي)
•الاسم الموصول اللي هوه اسم شامل و بيقابله في العربي 7 اسامى موصوله الذي،اللتي،اللذان و اللتان و اللذين و اللائي او اللاتي
•الاعراب (تغيير نهايات الكلمات للدلاله على وظيفتها) مش موجود بالمره في المصري و لا القبطي و لا اللغات المصريه اللي قبل كدا. العربي فيه تلات حالات اعراب النصب و الرفع و الجر.
اللهجة الاسكندرانية
لهجه أجدع ناس
هي اللهجة بتاعة الاسكندرية و بتشبه لحد كبير اللهجة القاهرية بس في ميل لاستخدام صيغة الجمع في الكلام للمتكلم المفرد (ح نتستنوك = ح نستناك). و شوية كلمات معينة خاصة بيها زي, ماستيكا= لبان و القمة = الناصية و الجومة = الاستيكة.
لهجة البحاروة
و دي لهجة الفلاحين (المصريين في شمال مصر) و بتتفرع اللهجة دي لـ:
1.اللهجات الوسطانية: في المنوفية و الغربية و جنوب الشرقية و القليوبية
2.اللهجات الشرقية: بقيت مناطق الشرقية و الدقهلية
3.اللهجات الغربية: في البحيرة و حتت في الغربية و البرولوس وغرب المنوفية
4.اللهجات الشمالية-الشرقية: الدقهلية و حتت في الغربية و المنزلة
لسه الموضوع طويل
راجع لكم تانى